Бүген, шәгъбан аеның 25нче көнендә (13нче февральдә), Татарстан мөфтиятендә шәрәфле кунак – Коры җир гаскәрләре башкомандующиеның хәрби-сәяси эшчәнлек буенча урынбасары, генерал-майор Сергей Марковчин булып китте. Сергей Григорьевичны Татарстан Мөфтие, Татарстан Республикасы мөселманнары Диния нәзарәте рәисе Камил хәзрәт Сәмигуллин каршы алды. Ул кунакка мөфтиятнең махсус хәрби операциядә катнашучыларга һәм аларның гаиләләренә ярдәм итү буенча эшчәнлеге, татар хәзрәтләренең хәрби операция зонасына гуманитар йөкләр тапшыруы турында сөйләде. Камил хәзрәт шулай ук Нәзарәтнең уникаль тәҗрибәсенә – фронтта блиндаж мәчетләр һәм мобиль мәчетләр ясавына тукталды. Сергей Григорьевич махсус хәрби операциядә катнашучыларга ярдәм итүдә Татарстан мөселманнарының керткән өлешен югары бәяләде һәм шулай ук үзе тарафыннан бу юнәлештәге эшләр турында сөйләде.
