27нче март көнне Болгар ислам академиясенең Казан вәкиллегендә академия үсешенең төп юнәлешләре хакында фикер алышуга һәм югары ислам мәгарифе өлкәсендә хезмәттәшлекне ныгытуга юнәлдерелгән эшлекле очрашу узды. Әлеге чарада Болгар ислам академиясе ректоры Фәрхәт Хөснетдинов, Татарстан Республикасы Мөфтие, Академияне Оештыручылар советы сәркатибе Камил хәзрәт Сәмигуллин, Ислам мәгариф шурасы директоры, РИИ һәм КИУ ректоры, ТР Мөфтиенең мәгариф буенча урынбасары Рәфикъ Мөхәммәтшин һәм шулай ук Академия хезмәткәрләре катнашты.
Очрашуда катнашучылар Академия эшчәнлегенә, оешмалар арасындагы хезмәттәшлеккә, Академия үсешенең стратегик перспективаларына, аның Россия ислам мәгарифе системасындагы роленә һәм мөселман өммәтенең рухи бердәмлеген ныгытуга керткән өлешенә кагылышлы актуаль мәсьәләләр буенча фикер алышты. Уку-укыту программаларын камилләштерү һәм фәнни-тикшеренү эшенең сыйфатын күтәрүгә дә тукталдылар.
Фикер алышу барышында Академия ректоры Фәрхәт Хөснетдинов, оештыручыларның берсе буларак, Татарстан Республикасы мөселманнары Диния нәзарәтенең әһәмиятле ролен аерым билгеләп үтте, аның Болгар ислам академиясенең стратегик үсешенә керткән өлешен ассызыклады. Ул академиянең уртак тырышлыгы нәтиҗәсендә төп бурычны – илебезнең дини мирасын торгызу һәм Россиядә ислам мәгарифе системасын үстерү бурычын уңышлы үти алуына ышаныч белдерде. Ректор шулай ук билгеләп үткәнчә, ТР мөселманнары Диния нәзарәте ярдәме белән академия базасында ел саен мөселман дин әһелләре өчен зур ихтыяҗга ия белем бирү курслары үткәрелә.
Фикер алышу барышында быелгы кабул итү кампаниясенә әзерләнүгә аерым игътибар бирелде. Җитәкчеләр сәләтле абитуриентларны җәлеп итү механизмнары хакында фикер алышты, югары квалификацияле дин белгечләренең яңа буынын формалаштыруның мөһимлеген ассызыкладылар. Очрашуда катнашучылар шулай ук белгечлекләр спектрын киңәйтергә һәм уку барышын заманча таләпләргә яраклаштырырга тиешле яңа белем бирү проектларын эшләтеп җибәрү перспективаларын җентекләп карады. Академиянең динара диалог һәм фәнни алмашуны үстерүгә ярдәм итүче зур халыкара һәм федераль чаралар уздыру мәйданчыгы буларак роле турында аерым фикер алышу булды.
Аннары Академиянең фән буенча проректоры вазыйфаларын башкаручы Айнур Солтанов очрашуда катнашучыларга Академиянең фәнни журналларын тәкъдим итте. Аерым алганда, «Вестник Болгарской исламской академии» һәм «Теология ислама: теория, история, практика» басмаларының редакцион планнары хакында фикер алыштылар. Бу фәнни басмалар ислам теологиясе, тарихы һәм мәдәнияте өлкәсендә алдынгы тикшеренүләрне бастыру мәйданчыгы булырга, мөселман югары уку йортларының академик мөмкинлекләрен үстерүгә ярдәм итәргә тиеш.
Очрашу йомгаклары буенча катнашучылар киләчәктә хезмәттәшлекне киңәйтергә теләк белдерде. Ислам мәгарифенең абруен күтәрү, мөселман югары һәм югары уку йортыннан соңгы белем бирү системасын үстерү өчен уртак тырышлыкларның әһәмияте ассызыкланды. Катнашучылар Болгар ислам академиясе югары квалификацияле кадрлар әзерләүдә һәм дин гыйлемен үстерүдә төп рольне уйнаячагына ышаныч белдерде.
Фотосурәтләр: Болгар ислам академиясенең матбугат хезмәте.
