22 апрельдә Казанда Татарстан мәдрәсәләре һәм ислам югары уку йортлары шәкертләре арасында татар теле, татар әдәбияты һәм татар халкы тарихы буенча VI Республика олимпиадасы узачак. Олимпиада Россия ислам институты башлангычы һәм ярдәме белән Татарстан мөселманнары Диния нәзарәте белән берлектә уздырыла.
Әлеге чара татар халкының бөек шагыйре Габдулла Тукайның 140 еллыгына һәм “Хәрби һәм хезмәт батырлыгы елы”на багышлап үткәрелә.
Интеллектуаль ярышларның төп максаты – студентларны татар теленә якынайту, татар мәдәниятенә хөрмәт тәрбияләү, сөйләм әдәбен камилләштерү.
Татар теленнән олимпиада язмача тест формасында, аерым биремнәрне үтәп узачак. Тест фонетика, лексикология, морфология, синтаксис һәм пунктуация буенча биремнәрне үз эченә ала һәм студентларның теоретик белем дәрәҗәсен, аларны практикада куллана белүләрен ачыклауга юнәлдерелә.
Татар әдәбиятыннан олимпиада тикшеренү эшен (кызлар өчен) яклаудан һәм телдән вәгазь сөйләүдән (егетләр өчен) гыйбарәт. Кызлар Нигезләмәдә тәкъдим ителгән темаларның берсенә тикшерү эшен алдан ук әзерләп куярга тиеш. Олимпиада вакытында алар жюри игътибарына тикшеренү эшенең төп асылын чагылдырган презентация тәкъдим итәчәкләр һәм сорауларга җавап бирәчәкләр. Эшне яклау өчен 7-10 минут вакыт бирелә. Ә егетләр 10-15 минут эчендә телдән алдан әзерләнгән вәгазьнең эчтәлеген сөйләргә тиеш булалар.
Татар халкы тарихы буенча олимпиада тесттан тора һәм фәнни-тикшеренү эшен тәкъдим итүдән гыйбарәт.
Олимпиадада һәр мәдрәсәдән һәр номинация буенча бер кеше катнаша ала, ә ислам югары уку йортыннан ике кеше рөхсәт ителә.
Олимпиада нәтиҗәләре буенча җиңүчеләр һәм призерлар 3 юнәлешнең һәркайсында аерым билгеләнәчәк.
Олимпиадада катнашырга теләүчеләргә 2026нчы елның 18нче апреленә кадәр исем-фамилия, әтисенең исеме, телефон номеры, электрон адрес, уку йорты, олимпиада юнәлеше һәм укытучыны күрсәтеп riitatkafedra@mail.ru почтасына гариза юлларга кирәк. Олимпиада турында тулырак – беркетелгән файлда.
Фотосурәт: Россия ислам институты матбугат хезмәте.
Нигезләмә 
