Корбан бәйрәме уңаеннан Татарстан мөселманнары Диния нәзарәтенең “Зәкят” хәйрия фонды республикабыздан мобилизацияләнгән сугышчыларга кыйммәтле гуманитар йөк – “Нива” машинасы җибәрде. Төрле дәрәҗәдәге юлларда йөрү өчен исәпләнгән үзебезнең ил машинасы хәрбиләргә азык-төлек һәм дарулар тапшырырга, шулай ук төрле бурычларны үтәргә ярдәм итәчәк.
Машина ачкычларын Татарстан Мөфтие Камил хәзрәт Сәмигуллин “Батыр” батальонында хезмәт итүче Диния Нәзарәтенең полк имамы Мөхәммәд хәзрәт Хәйрулаевка тапшырды. Автомобиль тиешле урынга барып җитте һәм сугышчыларга бәйрәмгә бүләкләр, шулай ук китаплар һәм догалыклар алып килде. Моннан тыш, Мөхәммәд хәзрәт батырларга мөселман гаиләләрендә тәрбияләнүче төрле яшьтәге балалар язып җибәргән хатларны тапшырды. Аларда балалар махсус хәрби операциядә катнашучыларга теләктәшлек белдерә, үз тормышлары турында сөйли һәм Ватанны саклаучыларга рәхмәтләрен белдерә.
