Диния нәзарәтенең «Зәкят» хәйрия фонды Татарстанда Корбан бәйрәме көннәрендә гадәттәгечә мохтаҗлар өчен бик күп хәйрия башлангычларын тормышка ашыра. Аларга, дине һәм милләтенә карамастан, ярдәм күрсәтелә. Әлеге ярдәмне аз керемлеләр һәм күпбалалы гаиләләр, авырулар, балаларын ялгызы тәрбияләүче әниләр, өлкән яшьтәгеләр һәм социаль яктан якланмаган башка кешеләр ала. Бәйрәм тантаналары чорында 320 дән артык баш терлек (сарык, кәҗә һәм сыер) корбанга китереләчәк дип көтелә: бу 4 тонна корбан ите дигән сүз.
Бүген «Зәкят» хәйрия фонды, алдагы еллардагы кебек үк, С.Садыйкова урамы, 6 йорт адресы буенча азык-төлек ярдәме күрсәтү буенча пункт эшчәнлеген җәелдереп, ит өләшә башлады. Корбан итен 100 гаилә алды инде.
"Зәкят" хәйрия фонды генераль директоры Булат Мәрданов сүзләренә караганда, «Зәкят» хәйрия фонды атна дәвамында 700 аз керемле гаиләгә корбан ите таратырга ниятли. Шулай ук ит Татарстандагы 10 лап социаль оешмага: «Диабетны җиңәбез» хәйрия фондына, Бөтенроссия инвалид балалар ата-аналары оешмасына, ТРның “Әтиләр берлеге”нә һ.б. җибәреләчәк.
Моннан тыш, "Зәкят" хәйрия фонды Корбан бәйрәме хөрмәтенә 30 мохтаҗ гаиләгә азык-төлек ярдәме күрсәтте. Алар арасында авырулар, пенсионерлар, Казанның һәм республиканың якын-тирә районнарында яшәүче күпбалалы гаиләләр дә бар иде. Хәйрия акциясе вакытында аларга азык-төлек җыелмалары тараттылар. Анда тушенка, бал, дөге, токмач, балык консервлары, шоколад, карабодай, хөрмә, чәй, тәм-томнар, консервланган персиклар, борчак, көнбагыш май, кофе, он, шикәр, печенье керде.
Шулай ук бәйрәм уңаеннан фонд оештырган махсус курсларда укыган һәм робот техникасы белән җитди мавыккан балаларга 5 комплект робот техникасы бүләк иттеләр.
Корбан бәйрәме көннәрендә шулай ук авыру 5 балага һәм мохтаҗ 5 өлкән кешегә акча җыю бара: аларга Фондның рәсми сайты аша ярдәм күрсәтергә мөмкин.
2025 елда да «Зәкят» фонды Корбан бәйрәме көннәрендә мохтаҗларга бик зур ярдәм күрсәтте. Бу чорда 218 сарык һәм кәҗә, 3 сыер корбанга китерелде: бу 3,6 тоннадан артык корбан ите дигән сүз. Әлеге чараның максаты аз керемле 500 гаиләгә – 1,5 тонна корбан ите һәм 6 социаль оешмага 300 кг ит өләшү иде. Калган ит ел дәвамында фондның хәйрия проектларында куллану өчен максатыннан туңдырып куелды.
Фонд, корбан ите белән тәэмин итүдән тыш, аерым кешеләргә финанс ярдәме дә күрсәтте. Бәйрәм уңаеннан аз керемле, күпбалалы, тулы булмаган 10 гаиләдә тәрбияләнүче укучыларга барлыгы 400 мең сумлык ноутбуклар бүләк итте.
Бәйрәм көннәрендә авыру балаларга һәм мохтаҗ өлкәннәргә ярдәм итүгә аерым игътибар бирелде. Корбан гаете көннәрендә авыру 8 балага һәм мохтаҗ 4 өлкән кешегә 1 300 000 сумлык финанс ярдәме күрсәтелде. Бу акчалар дәвалану, дарулар сатып алу һәм башка кирәк-яраклар өчен тотылды.
Шулай итеп, 2025 елда Корбан бәйрәмен бәйрәм итү рухи яктан чистарыну һәм иманны ныгытырга гына түгел, якыннарыбызны кайгыртырга, мохтаҗларның тормышын яхшыртырга мөмкинлек бирде.
