Бүген, мөхәррам аеның 4 нче көнендә (19 июнь), изге җомга көнендә Татарстан мөфтиятенең “Зәкәт” хәйрия фонды 30 мохтаҗ гаиләгә азык-төлек ярдәме күрсәтте. Алар арасында авырулар, пенсионерлар, Казанның һәм республиканың якын-тирә районнарында яшәүче күпбалалы гаиләләр дә бар иде. Хәйрия акциясе вакытында аларга азык-төлек җыелмалары тараттылар. Анда тушенка, бал, дөге, токмач, балык консервлары, шоколад, карабодай, хөрмә, чәй, тәм-томнар, консервланган персиклар, борчак, көнбагыш май, кофе, он, шикәр, печенье керде.
Фонд азык-төлек җыелмаларын дин кардәшләребезнең сәдакалары, битараф булмаган кешеләрнең матди ярдәме белән әзерләде. Мохтаҗларны һәм инвалидларны сөендерү алга таба да дәвам итәчәк.
Бу изге гамәлдә катнашырга теләсәгез, Фондның рәсми сайты аша акча җибәрә аласыз.
Аллаһы Тәгалә сезнең изге гамәлләрегезне кабуллардан кылсын!
