2 апрельдә аутизм проблемалары хакында мәгълүмат таратуның Халыкара көне билгеләп үтеләчәк. Бу уңайдан РФ Мөселман эшмәкәрләре ассоциациясенең Хәйрия фонды Нәзарәтнең “Зәкят” хәйрия фондында махсус чара үткәрде. "Зәкят" карамагында тәрбияләнүче, физик сәламәтлеге чикле, шул исәптән аутизмнан интегүче балаларның күңелен күрү өчен оештырылган бәйрәмдә 50-гә якын кеше - әниләр һәм сабыйлар катнашты. Алар өчен Рамазан турында вәгазь сөйләнде, төрле иҗади мастер-класслар күрсәтелде, бәйрәмчә чәй өстәле әзерләнде, ахырдан истәлекле бүләкләр өләшенде. Инвалид балалар тәрбияләүчеләр әлеге чарадан бик зур канәгатьлек алып, оештыручыларга зур рәхмәтләр әйтеп кайтып китте.
