Фәнис Яруллин белән очрашу

2011 елның 29 ноябрь көнне ТР МДН «Зәкәт» Хәйрия Фонды вәкилләре Халыкара инвалидлар көне уңаеннан Татарстанның халык шагыйре, Г.Тукай hәм М. Җәлил исемендәге Дәуләт бүләкләре лауреаты, Татарстан Республикасының атказанган мәдәният хезмәткәре, «Халыклар дуслыгы» ордены кавалеры Фәнис Яруллин белән очрашты. Яшь вакытта алынган җитди травмадан соң Яруллин йөри алмый башлый. 50 елдан артык урын өстендә ятканына карамастан, ул бервакытта да оптимизм, түземлек hәм тормышка булган мәхәббәт кебек күркәм сыйфатларны югалтмый. Авыр сынауларга карамастан, яшәргә омтылышны ничек саклап калырга hәм төшенкелеккә бирелмәскә дигән сорауга Фәнис абый болай дип җавап бирде: «Беренчедән, hәрвакыт хәрәкәттә, эшчән, тырыш, актив булырга, үзеңнең өстендә эшләргә, икенчедән, тормышны hәм кешеләрне яратырга, гел гашыйк булып яшәргә кирәк», - диде. Һичшиксез, Фәнис Яруллинның тормыш юлы – ул искиткеч рухи көч, кеше үз кимчелекләреннән өстен була алу, акыл hәм талантның ихтыярсызлык hәм төшенкелекне җиңә алуының күркәм үрнәге.